Staðan desember 2024
Aðgerð lokið.
Reykjavíkurborg er með fimm verkefni í BREEAM-ferli; Fiskislóð, Sundhöllina, Kleppsveg, Úlfarsárdalur, Grófarhús.
Árið 2024 hlaut Fífuborg Svansvottun fyrir endurbætur. Stefnt er á Svansvottun fyrir endurbætur í fimm öðrum skólabyggingum; Garðaborg, Grandaborg, Hálsaborg, Hólabrekkuskóli og Vörðuskóla.
Þar að auki eru þrjú nýbyggingarverkefni í gangi sem stefna að Svansvottun, öll leikskólar á útboðsstigi.
VSÓ var fengið til að vinna að skýrslu og meta ávinning og kostað vegna Svanvottaðra endurbótaverkefna hjá Reykjavíkurborg. Samantekt á niðurstöðum er eftirfarandi:
Svansvottun stuðlar að gæðum bygginga sem uppfylla stefnu Reykjavíkurborgar í skóla-, húsnæðis-, umhverfis- og loftslagsmálum. Hún byggir á skýrum og viðurkenndum viðmiðum samkvæmt ISO 14024 staðlinum, sem eykur áreiðanleika og tryggir að framkvæmdum sé lokið í samræmi við viðurkennd ferli. Með nákvæmum greiningum og úttektum áður en hönnun hefst næst betri nýting fjármagns, minni líftímakostnaður og lægri rekstrarútgjöld.
Hagaðilar hafa lýst yfir ánægju með skýrleika og samræmi í vinnubrögðum vottunarinnar, og hún gerir ráð fyrir háum kröfum um umhverfisvæn efni sem eru þegar til staðar í stefnu Reykjavíkurborgar. Þrátt fyrir aukinn upphafskostnað og lærdómskostnað við fyrstu verkefni fer umsýslukostnaður hratt lækkandi með aukinni reynslu og þekkingu.
Niðurstöður benda til þess að framkvæmdakostnaður Svansvottaðra verkefna sé sambærilegur við óvottaðar framkvæmdir. Ávinningurinn liggur í hærri gæðum, bættri nýtingu fjármagns og skýrari verkferlum sem styðja við langtímamarkmið borgarinnar.
Unnið er að því að því að ljúka við uppfærslu á grænum ramma (Green Bond Framework) Reykjavíkurborgar vegna útgáfu grænna skuldabréfa. Í græna rammanum er skilgreint hvaða fjárfestingar geta fallið undir fjármögnun Reykjavíkurborgar með grænum skuldabréfum. Í nýjum ramma uppfylla BREEAM, LEED og Svansvottun sem og sambærilegar vottanir fyrir byggingar skilyrði græna rammans að uppfylltum sértækum viðmiðum. Þar að auki munu verkefni þar sem orkunýtni er bætt um 30% eða meira falla undir græna rammann. Unnið er að viðhaldi bygginga borgarinnar þar sem orkunýtni í eldri byggingum mun vera bætt með ýmsum aðgerðum, t.a.m. einangrun útveggja og þaks, uppsetningu loftræsikerfa o.fl.
Í janúar 2023 hófst vinna við gerð kolefnisreiknis fyrir innviði og er Reykjavíkurborg þátttakandi í því verkefni ásamt Vegagerðinni, Eflu, Ístak, Veitum og Kópavogsbæ. Markmið kolefnisreiknisins er m.a. að hægt verði að nýta hann við greiningu valkosta til að draga úr kolefnisspori mannvirkjagerðar.
Lokaafurð aðgerðar
Aðgerðin hefur leitt til aukinnar áherslu á umhverfisvottun hjá Reykjavíkurborg, með fimm verkefnum í BREEAM-ferli og fjölmörgum verkefnum sem stefna að Svansvottun. Niðurstöður sýna að Svansvottun stuðlar að betri gæðum bygginga, lægri líftímakostnaði og styður stefnu borgarinnar í loftslagsmálum og sjálfbærni. Þrátt fyrir aukinn upphafskostnað er framkvæmdakostnaður sambærilegur við óvottaðar framkvæmdir, með ávinningi í formi hærri gæða og skýrari verkferla.
Annað tengt efni
Tengiliðir
Sólveig Björk Ingimarsdóttir, solveig.bjork.ingimarsdottir@reykjavik.is
Hulda Hallgrímsdóttir, verkefnastjóri atvinnu- og borgarþróunar, Reykjavíkurborg, hulda.hallgrimsdottir@reykjavik.is
