Verkefnið

Byggjum grænni framtíð er samstarfsverkefni stjórnvalda og hagaðila byggingariðnaðarins um vistvænni mannvirkjagerð en það á meðal annars rætur sínar að rekja til aðgerðar C.3 í aðgerðaáætlun stjórnvalda í loftslagsmálum.

Verkefnastjórn verkefnisins er skipuð fulltrúum frá Grænni byggð, Samtökum iðnaðarins, Vegagerðinni, Umhverfisstofnun, Sambandi íslenskra sveitarfélaga, Reykjavíkurborg, innviðaráðuneytinu, umhverfis-, orku- og loftslagsráðuneytinu og HMS. 

Frá september 2020 til maí 2022 fólst megin viðfangsefnið í að afla upplýsinga um losun mannvirkjagerðar á viðmiðunarári, setja markmið um að minnka þá losun til 2030 og skilgreina aðgerðir svo það takist. 

Hópar 1 til 5 (sjá hér neðar) störfuðu frá janúar til maí 2021 en hlutverk þeirra var að skilgreina aðgerðir til að minnka losun og umhverfisáhrif mannvirkja- og byggingargeirans m.t.t. byggingarefna, skipulags og hönnunar mannvirkja, framkvæmdasvæða, notkunartíma mannvirkja og loka á líftíma þeirra. Haldnar voru fimm vinnustofur á vegum hópanna í mars 2021, þar sem um 160 manns tóku þátt. Auk þess leituðu hóparnir eftir þekkingu og reynslu annarra hagaðila innan byggingar- og mannvirkjageirans.

Hópur 6 (sjá hér neðar) starfaði frá janúar til júlí 2021. Viðfangsefni hans fólst í að meta losun mannvirkja- og byggingargeirans á viðmiðunarári (2019-2020). Þá tók hópurinn við tillögum hópa 1 til 5 og mat í framhaldinu áhrif þeirra aðgerða á losun iðnaðarins. 

Gagna var m.a. aflað frá umhverfis- og auðlindaráðuneytinu, Umhverfisstofnun, Fasteignaskrá, Hagstofunni, Orkustofnun og Húsnæðis- og mannvirkjastofnun.

Allir hagaðilar hafa verið hvattir til að taka þátt í vinnustofum,  samtölum og viðburðum sem farið hafa fram á vegum verkefnisins. 

Veturinn 2021-2022 var haft samband við þá fjölmörgu aðila sem lagt var til að bæru ábyrgð á viðkomandi aðgerðum og áhugi þeirra á þátttöku kannaður. Um leið var unnið að því ða koma fjölmörgum aðgerðum í farveg, m.a. með stofnun Asks – mannvirkjarannsóknarsjóðs, endurskoðun á steypukafla byggingarreglugerðarinnar o.fl.

Í febrúar 2022 voru gefnar út niðurstöður á mat á losun byggingariðnaðarins og þann 9. júní 2022 markmiðin og aðgerðirnar.

Í framhaldinu fóru markmiðin og aðgerðirnar í opið samráðsferli og næsti fasi verkefnisins hófst haustið 2022; innleiðingarfasinn. Miðað er við að endurskoðun á losun, markmiðum og aðgerðum fari fram fyrir lok árs 2024.

Þau sem vilja fá tölvupósta með tilkynningum um vinnustofur og aðrar vörður verkefnisins eru hvött til að skrá sig hér: http://eepurl.com/hqgnYX