3.16 Sólarsellur og vindorka

Eiríkur Örn ÞorsteinssonAðgerðir sem stuðla að vistvænni mannvirkjagerð 2025, Notkunartími mannvirkja

Meta raunhæfi og möguleika á nýtingu endurnýjanlegrar orku í formi sólarsella og smærri vindorkulausna við íslenskar aðstæður, bæði til eigin notkunar og mögulegrar sölu á afgangsorku inn á dreifikerfi. Unnið verður með fyrirliggjandi greiningar og þekkingu á sviði nýtingar endurnýjanlegrar orku og þróuð áfram útfærsla sem nýtist í mannvirkjagerð.

Horft verður til tækniþróunar, nýtingarhlutfalls, árstíðabundinna áhrifa og lagalegra og reglugerðartengdra þátta, s.s. byggingarreglugerðar, rafmagnsöryggis og aðgangs að dreifikerfi. Lagt verður mat á hvaða hindranir eru til staðar, hvaða forsendur þurfa að vera til staðar og hvaða aðgerðir styðja við notkun þessara lausna í mannvirkjum.

Markmið:
Að varpa ljósi á raunhæfa möguleika á innleiðingu sólar- og vindorku í mannvirkjagerð og hvernig mætti nýta slíka orku með sjálfbærum og hagnýtum hætti. Skilgreina tækifæri og takmarkanir, og setja fram tillögur að úrbótum á regluverki, innviðum eða fræðslu til að stuðla að aukinni orkunýtni og fjölbreyttari orkuöflun í mannvirkjum.

Ábyrgð: HMS, Vegagerðin, UOS, URN, Sambandið

Tími: 2025-2026

3.15. Fræðsla til hagsmunaaðila um uppfærslu á tilskipun Evrópusambandsins um orkunýtni bygginga (EPBD).

Eiríkur Örn ÞorsteinssonAðgerðir sem stuðla að vistvænni mannvirkjagerð 2025, Notkunartími mannvirkja

Aðgerðin miðar að því að auka þekkingu íslenskra hagsmunaaðila á uppfærðri tilskipun Evrópusambandsins um orkunýtni byggingar (EPBD) sem tók gildi 2024. Lögð verður áhersla á tvo nýja staðla: Lágmarks staðla fyrir orkunýtni (Minimum Energy Performance Standards, MEPS) og staðal um líkur á hnattrænni hlýnun yfir lífsferil (Life Cycle Global Warming Potential (kolefnislosun yfir líftíma). Þessar upplýsingar verða kynntar á kynningarviðburði og í stuttu skjali með samantekt um uppfærsluna á íslensku. Þessi uppfærsla á EPBD er tengds BGF aðgerð 3.2 sem gengur út á að samræma aðferðafræði við gerð orkuútreikninga mannvirkja og gefa út viðmið fyrir orkuflokka bygginga.

Markmið: Að stuðla að auknum skilningi á markmiðum og kröfum EPBD og taxonomy meðal íslenskra hagsmunaaðila.
Ásamt því að veita upplýsingar og útskýra hvernig þessar reglur styðja við sjálfbærni og orkunýtingu í byggingum.

Ábyrgð: HMS og Grænni byggð

Tími: 2025-2026

3.14. Útfærsla á útgáfu orkuskírteina

Eiríkur Örn ÞorsteinssonAðgerðir sem stuðla að vistvænni mannvirkjagerð 2025, Notkunartími mannvirkja

Þróa og innleiða ferli fyrir útgáfu orkuskírteina sem byggist á skilgreindum kröfum um orkuflokkun og orkunýtingu mannvirkja. Ferlið skal vera í samræmi við ákvæði EPBD (Energy Performance of Buildings Directive) og Taxonomy-kröfur Evrópusambandsins. Lagt verður upp með að greina hvernig slíkt kerfi hefur verið útfært í öðrum löndum og nýta erlendar fyrirmyndir til að þróa íslenskt fyrirkomulag. Þessi aðgerð kallar jafnframt á uppfærslu á lögum og reglugerðum til að tryggja innleiðingu og samræmi við alþjóðlegar skuldbindingar.

Markmið: Að leggja grunn að markvissri innleiðingu og framkvæmd orkuskírteina í íslensku regluverki.

Ábyrgð: HMS, FRN, UOS

Tími: 2025-2028

3.13. Uppfæra staðla og gefa út leiðbeiningar til að stuðla að vistvænu viðhaldi

Eiríkur Örn ÞorsteinssonAðgerðir sem stuðla að vistvænni mannvirkjagerð, Notkunartími mannvirkja

Tekið til umræðu, með þátttöku Staðlaráðs Íslands, hvort hægt sé að gera viðbætur við staðla um ráðgjöf (ÍST-35) og verkframkvæmdir (ÍST-30) svo þeir endurspegli tækifæri fyrir vistvænar áherslur.
Gerðar verði leiðbeiningar til ráðgjafa, eigenda og rekstraraðila mannvirkja um viðhald og endurbætur á húsnæði, þar sem grunnhugsunin er að velja úrræði sem veldur sem minnstum umhverfisáhrifum. Einnig verði gerðar leiðbeiningar fyrir verktaka um framkvæmd viðhalds og endurbóta.

Markmið: Að lengja líftíma mannvirkja og minnka kolefnisspor vegna viðhalds og endurbóta, með því að auka meðvitund á mikilvægi viðhalds og endurbóta annars vegar og hins vegar með því að auka þekkingu á lausnum fyrir viðhald og endurbætur.

Ábyrgð: HMS.

Tími: 2024.

3.12. Virkja Handbók hússins og skrá fleiri upplýsingar í hana

Eiríkur Örn ÞorsteinssonAðgerðir sem stuðla að vistvænni mannvirkjagerð, Notkunartími mannvirkja

Lagðar eru til breytingar á kafla 16.1 í byggingarreglugerð, og afleiddum ákvæðum, ásamt uppfærslu á leiðbeiningum með 16.1.1. gr. byggingarreglugerðar, sem verði á þá leið að handbók mannvirkis (stundum líka nefnd Handbók hússins) verði virkjuð og tryggt að hún geymi upplýsingar um hönnun, útreikninga, prófanir, efnisnotkun ásamt niðurstöðum orkuútreikninga og loftþéttileikaprófs. Eigendur hafi greiðan aðgang að handbókinni yfir allan líftíma mannvirkis, til dæmis í gegnum Mannvirkjaskrá , og að þeim sé gert auðvelt að skrá og uppfæra framkvæmdasögu (s.s. efnisval, umfang og framkvæmdaraðila) viðkomandi mannvirkis, m.t.t. viðhalds og endurbóta. Um leið þarf að gæta að því að handbókin verði ekki of flókin eða íþyngjandi.

Markmið: Að tengja saman í einu gagni hönnunar- og framkvæmdaforsendur og líftímanotkun byggingarinnar, sem hvetur framkvæmdaaðila til að huga að líftímanotkun. Notendur hafi vitneskju sem nauðsynleg er til að taka skynsamar og vistvænar ákvarðanir varðandi viðhald og rekstur á grunni hönnunar byggingarinnar.

Ábyrgð: Innviðaráðuneyti og HMS.

Tími: 2023-2025.

3.11. Móta stefnu um vistvænt viðhald opinberra bygginga

Eiríkur Örn ÞorsteinssonAðgerðir sem stuðla að vistvænni mannvirkjagerð, Notkunartími mannvirkja

Stefna mótuð og leiðbeiningar gerðar til að innleiða og framfylgja þeirri stefnu í verkefnum Framkvæmdasýslunnar – Ríkiseigna.

Markmið: Að sýna frumkvæði á markaði hvað þetta varðar og vera fyrirmynd fyrir aðra. Að minnka kolefnislosun vegna viðhalds.

Ábyrgð: Framkvæmdasýslan – Ríkiseignir.

Staðan í maí 2022: Undirbúningur hafinn.

Tími: 2022-2024.

3.10. Setja kröfu í byggingarreglugerð um orkunýtni nýbygginga

Eiríkur Örn ÞorsteinssonAðgerðir sem stuðla að vistvænni mannvirkjagerð, Notkunartími mannvirkja

Byggt verði á reynslu og þekkingu sem myndast hefur við samræmda orkuútreikninga, þau orkuviðmið sem sett hafa verið fram og rannsóknum á umræddu sviði.

Markmið: Að draga úr orkunotkun og losun vegna hennar, með kröfu um orkunýtni nýbygginga.

Ábyrgð: Innviðaráðuneyti og HMS.

Tími: 2028.

3.9. Rannsaka möguleikana á að setja kröfu um uppsetningu stýrðra loftræstikerfa með varmaendurvinnslu í ákveðnum flokkum nýbygginga

Eiríkur Örn ÞorsteinssonAðgerðir sem stuðla að vistvænni mannvirkjagerð, Notkunartími mannvirkja

Mikið orkutap á sér stað þegar ekki er til staðar stýrð loftræsting. Lagt er til að skoðað verði hvort setja eigi ákvæði í byggingarreglugerð um að loftræstikerfi í ákveðnum flokkum nýbygginga skuli hannað, gert, rekið og viðhaldið þannig að það uppfylli ákveðnar lágmarkskröfur um orkunýtni og loftgæði. Ítarleg vinna við skilgreiningu á lágmarkskröfum þarf að fara fram, m.a. kostnaðar- og ábatagreining. Hægt væri að herða kröfurnar með árunum, og um leið skoða möguleika á hagrænum hvötum. Lagt er til að breytingarnar verði gerðar sem fyrst en gefinn ákveðinn tími til aðlögunar. Í framhaldinu mætti skoða möguleikana á uppsetningu stýrðra loftræstikerfa með varmaendurvinnslu í eldri byggingum.

Markmið: Að draga úr orkunotkun og losun vegna hennar, með notkun varmaendurvinnslu í loftræstikerfum. Að draga úr áhættu á loftgæða- og rakavandamálum yfir líftíma byggingar.

Ábyrgð: Innviðaráðuneyti og HMS.

Tími: 2022-2024.

3.8. Samræma aðferðir við varma- og rakaflæðisútreikninga

Eiríkur Örn ÞorsteinssonAðgerðir sem stuðla að vistvænni mannvirkjagerð, Notkunartími mannvirkja

Virkja þarf betur ákvæði 4.5.3. gr. í byggingarreglugerð og viðeigandi leiðbeiningum, um skil á greinargerð um einangrun og raka í gegnum byggingarleyfi og lokaúttekt, með því að koma á samræmdum aðferðum við varma- og rakaflæðisútreikninga. Í samstarfi viðeigandi hagaðila verði samræmd aðferðarfræði skilgreind þar sem sett verða fram viðmið bygginga fyrir íslenskar aðstæður. Lagt er til að viðmiðin verði hert jafnt og þétt til framtíðar.

Markmið: Að minnka orkusóun. Að lengja líftíma mannvirkja með því að draga úr áhættu á loftgæða- og rakavandamálum yfir líftíma þeirra.

Ábyrgð: Innviðaráðuneyti og HMS.

Tími: 2022-2024.

3.7. Rannsaka hvort og hvernig bæta megi orkunýtingu eldri bygginga, þannig að það leiði til umhverfislegs og jafnvel fjárhagslegs ávinnings til lengri tíma

Eiríkur Örn ÞorsteinssonAðgerðir sem stuðla að vistvænni mannvirkjagerð, Notkunartími mannvirkja

Upplýsingar benda til að hægt sé að bæta orkunotkun eldri bygginga. Hins vegar er óljóst hvort slíkar aðgerðir borgi sig til lengri tíma í umhverfislegu tilliti.

Markmið: Að kanna hvort og hvernig unnt sé að draga úr orkunotkun og losun vegna hennar í eldri byggingum.

Ábyrgð: Innviðaráðuneyti og HMS.

Tími: 2022-2024.