Í lok árs 2020 voru gefnar út tvær samantektir á vegum verkefnisins Byggjum grænni framtíð. Í þeirri fyrri eru teknar saman vistvænar áherslur í byggingariðnaði á Norðurlöndum og í þeirri seinni er farið yfir vistvænar áherslur í íslenskum byggingariðnaði.

Með þessari vinnu er gerð tilraun til að ná ákveðinni yfirsýn yfir stöðu málaflokksins í lok árs 2020 en í  hvorugu tilfellinu er um tæmandi umfjöllun að ræða. Vonast er til að samantektirnar hafi hvetjandi áhrif og komi meðal annars að notum við skilgreiningu aðgerða til að draga úr losun frá byggingariðnaðinum og minnka umhverfisáhrif hans.